மக்களுக்குத் தேவையானது சோசலிச மாடல்தான்

 

தமிழ் நாட்டின் ஆளுநர் ரவி இன்று தமிழ் நாட்டில் மட்டுமல்லாமல் இந்தியா முழுவதும் பேசுபொருளாக மாறியுள்ளார். அவர் ஆளுநர் பொறுப்பில் உள்ளார் என்பதை மறந்து விட்டு ஓர் ஆர்.எஸ்.எஸ். பிரச்சாரராகச் செயல்பட்டு வருகிறார். தமிழ் நாடு  என்ற பெயருக்குப் பதிலாக தமிழகம் என்ற பெயர்தான் இருக்க வேண்டும் என்கிறார். Union Government என்பதற்கு ஒன்றிய அரசாங்கம்  என்று சொல்லக் கூடாது என்கிறார். ‘தமிழ் நாடு’ ‘ஒன்றிய அரசாங்கம்’ என்று குறிப்பிட்டால் அது பிரிவினைவாதத்திற்கு கொண்டு செல்லும் எனக் கூறி அந்த வார்த்தைகளைப்  பயன்படுத்தக் கூடாது என்கிறார். இவ்வாறு பேசுவதன் மூலம் தமிழின மக்களின் தேசிய உணர்வைக் கொச்சைப்படுத்தவும் காயப்படுத்தவும் செய்கிறார்.

தான் செல்லும் இடங்களில் எல்லாம் சனாதனப் புகழ் பாடி வருகிறார். இந்துத்துவவாதிகளின் ஏஜண்டாகச் செயல்பட்டு வருகிறார். மதச் சார்பற்ற அரசின் பொறுப்பான பதவியில் உள்ள ஒருவர் இவ்வாறு பேசுவது இந்த நாட்டின் அரசியல் அமைப்புச் சட்டத்திற்கு விரோதமானது என்பதை அறிந்தும் தொடர்ந்து இந்தச் செயலில் ஈடுபட்டு வருகிறார்.

ஆளுநர் என்பவர் அந்த மாநிலத்தில் உள்ள அரசின் தலைவர் என்பதையும், அவர் அந்த மாநிலத்தின் அமைச்சரவையால் தயாரிக்கப்பட்ட உரையைத்தான் வாசிக்க வேண்டும் என்ற சபை மரபையும்  மீறிச் செயல்படுகிறார். இந்த ஒன்றிய அரசில் தேசிய இனத்திற்கு எஞ்சியுள்ள சில உரிமைகளையும் எதேச்சதிகாரமாகப் பறிக்க முயல்கிறார்.

ஒரு சில மாநிலங்களில் மட்டும் வேறு கட்சிகள் ஆட்சியில் இருப்பதை பா.ஜ.க.வால் பொறுத்துக்கொள்ள முடியவில்லை. இந்தியா முழுவதும் தனது ஆட்சியை நிறுவி, பெரும் முதலாளிகளுக்கும், பன்னாட்டு முதலாளிகளுக்கும் ஏஜண்டாகச் செயல்படுவதன் மூலம் அதிகாரத்தைச் சுவைக்க வேண்டும் என்றும், பெரும் செல்வதைக் குவித்துக் கொள்ள வேண்டும் என்றும் அந்தக் கட்சியினர் திட்டமிடுகின்றனர். அந்தத் திட்டத்தின் அடிப்படையில்தான்  பா.ஜ.க.வின் அரசியல் ஏஜண்டாக,  தமிழ் நாட்டில் அந்தக் கட்சியை எப்படியாவது ஆட்சிக் கட்டிலில் அமர்த்தி விட வேண்டும் என்ற முனைப்புடன் செயல்படுகிறார். ஆளுநர் ரவி. அதற்காகவே பெரும்பான்மை மக்களாக உள்ள இந்துக்களின் வாக்கு வாங்கியை முழுமையாக அபகரிக்கத் திட்டமிட்டு சனாதனப் பெருமை, வளர்ச்சி மாடல் என்று பேசி வருகின்றனர் பா.ஜ.க.வினர். ஆளுநர் ரவியும் அவர்களில் ஒருவர்.

பா. ஜ. க.வின் சனாதனம், இந்து மதப் பெருமை என்ற அரசியலை எதிர் கொண்டு முறியடிக்க தி.மு.க. ‘திராவிட மாடல்’ எனக் கூறி தமிழின மக்களின் வாக்கு வங்கியைக் குறி வைத்து வேலை செய்கிறது.

பா.ஜ.க. ‘சனாதன மாடலாக’ இருந்தாலும்,  தி.மு.க.வின் ‘திராவிட மாடலாக’ இருந்தாலும், அனைத்து மாடல்களும்  முதலாளிய வர்க்கத்தின் வளர்ச்சிக்கான மாடல்கள்தான். இந்த மாடல்களால் அனைத்து இந்து மக்களும், அனைத்துத் தமிழின மக்களும் பயனடையப் போவதில்லை.  அவற்றால் பயனடைபவர்கள் முதலாளிகள்தான். அதைத்தான் பா.ஜ.க.வின் கீழ் உள்ள மாநிலங்களிலும், தி.மு.க.வின் கீழுள்ள தமிழ் நாட்டிலும் நடக்கும் அனைத்துப் பகுதிகளைச் சேர்ந்த மக்களின் போராட்டங்கள் மெய்ப்பிக்கின்றன. விவசாயிகள், தொழிலாளர்கள், அரசு ஊழியர்கள், மின் வாரிய ஊழியர்கள், போக்குவரத்துத் தொழிலாளர்கள், ஆசிரியர்கள், அரசு மருத்துவர்கள், செவிலியர்கள் என அனைத்து மக்களும் போராடி வருகின்றனர். முதலாளிய வர்க்கத்தையும் அதிகாரவர்க்கத்தையும்  தவிர அனைத்துப் பிரிவு மக்களும் போராடி வருகின்றனர்.

முதலாளிய வர்க்கக் கட்சிகளின் மாடல்கள் எதுவாக இருந்தாலும் அது சுரண்டலை ஒழிக்கப்போவதில்லை; மக்களுக்கு நல்வாழ்வைத் தரப் போவதில்லை. உண்மையில் சுரண்டலை ஒழித்து, மக்கள் அனைவருக்கும் நல்வாழ்வைத் தரக் கூடிய மாடல், தேசிய இனங்களின் அரசியல் சுய நிர்ணய உரிமையை உறுதிப்படுத்தக் கூடிய  மாடல் சோசலிச மாடல்தான். முதலாளிய மாடல்களை முறியடித்துச்  சோசலிச மாடலை உருவாக்க பாட்டாளி வர்க்கத்தின் தலைமையில் அனைத்து மக்களும் அணி  திரள வேண்டும்.

சோசலிசத் தொழிலாளர் இயக்கம்

தமிழ்நாடு