சபரிமலை தீர்ப்பும் கேரள அரசாங்கத்தின் தவறான அணுகுமுறைகளும்!

       சபரி மலையில் உள்ள ஐயப்பன் கோவிலுக்கு 10 வயது முதல் 50 வயது வரையிலுமான பெண்கள் செல்வதற்கு இருந்த தடையை கடந்த ஆண்டு செப்டம்பர் மாதம் உச்சநீதிமன்றம் தனது தீர்ப்பின் மூலம் நீக்கியது.

       ஆனால் அதற்கு எதிராக இந்துத்துவாப் பரிவாரங்களும் ஆணாதிக்க மனப்பான்மை கொண்டவர்களும் பிற்போக்கு சக்திகளும் போராட்டம் நடத்தின. கோவிலுக்குச் சென்ற பெண்களை வலுக்கட்டாயமாகப் போராட்டக்காரர்கள் தடுத்தனர். மார்க்சிஸ்ட் கட்சியின் தலைமையில் உள்ள கேரள அரசாங்கம் போராட்டக்காரர்கள் மீது கடுமையான நடவடிக்கைளை எடுத்தது. அரசாங்கம் மத நம்பிக்கையில் தலையிடுவதாகக் கூறி போராட்டக்காரர்கள் தமது போராட்டத்தை அரசாங்கத்திற்கு எதிராகத் திருப்பினர். பா.ஜ.க. மட்டுமல்லாமல் காங்கிரஸ் போன்ற கட்சிகளும் அடுத்து வரவிருந்த பாராளுமன்றத் தேர்தலில் ஆதாயம் பெறுவதற்காக இந்தப் போராட்டத்தையும் ஒரு கருவியாக பயன்படுத்திக் கொண்டன. அதில் வெற்றியும் பெற்றன. பாராளுமன்றத் தேர்தலில் மார்க்சிஸ்ட் கட்சி படுதோல்வி  அடைய இதுவும் ஒரு காரணமாக அமைந்தது.

       இந்த நிலையில் கடந்த ஆண்டு வழங்கப்பட்ட தீர்ப்பை மறு ஆய்வு செய்யக் கோரி தாக்கல் செய்யப்பட்ட மனுக்களை விசாரித்த ஐந்து நீதிபதிகள் கொண்ட உச்சநீதிமன்ற அமர்வு  நவம்பர் மாதம் 14 ஆம் தேதி (14.11.2019) தனது தீர்ப்பை வழங்கியது. இந்த வழக்கை விசாரித்த  ஐந்து நீதிபதிகளில் மூன்று நீதிபதிகள் வழக்கை ஏழு பேர் கொண்ட அரசியல் சாசன அமர்வு விசாரிக்க வேண்டும் என்றும், அதுவரை கடந்த ஆண்டு வழங்கப்பட்ட தீர்ப்பு செல்லும் என்றும்  தீர்ப்பு கூறியதால் இப்பொழுது வழக்கு ஏழு பேர் கொண்ட அமர்வுக்கு மாற்றப்பட்டுள்ளது. ஆனால் அமர்வில் இருந்த  நீதிபதிகள் நாரிமனும் சந்திர சூடும் சீராய்வு கோரிய அனைத்து மனுக்களையும் தள்ளுபடி செய்து, பழைய தீர்ப்பே செல்லும் என்றும் தீர்ப்பளித்துள்ளனர். அதை நடைமுறைப்படுத்த அரசாங்கம் அனைத்து நடவடிக்கைகளையும்  எடுக்க வேண்டும் என்றும் வலியுறுத்தியுள்ளனர். ஆனால் ஐந்து நீதிபதிகளும் இறுதித் தீர்ப்பு வரும் வரையிலும் கடந்த காலத் தீர்ப்பே செல்லும் என்றும் அதற்குத் தடையில்லை என்றும் கூறியுள்ளனர்.

       ஆனால், சிபிஎம் தலைமையிலான கேரள அரசாங்கம் இதைப் பொருட்படுத்தாமல் கேரள தேவசம் போர்டு அமைச்சர் கடகம்பள்ளி சுரேந்திரன் சபரிமலைக் கோவிலில் பத்து முதல் ஐம்பது வயது வரையிலான பெண்களுக்கு அனுமதி இல்லை என்றும், இதை மீறி வருபவர்களுக்குப் போலீஸ் பாதுகாப்பு வழங்கப்படமாட்டாது என்றும் தெரிவித்துள்ளார்.

       கேரள சட்ட அமைச்சர் பாலன் மேலும் ஒரு படி மேலே  சென்று சபரிமலையின் புனிதத்தை கெடுக்க பெண்கள் யாரும் முயற்சிக்க வேண்டாம் என்று கூறியுள்ளார். அதன் மூலம் பெண்களைப் புனிதமற்றவர்கள் என்று அவர் கருதுகிறார் போலும். பெண்கள் புனிதமற்றவர்கள் என்றால் அவர்கள் வயிற்றில் தோன்றிய ஆண்கள் மட்டும் எவ்வாறு புனிதமானவர்களாக, பெண்களை விட உயர்ந்தவர்களாக இருக்க முடியும்? இங்கு அவர் ஓர் மார்க்சியவாதி போல  பேசவில்லை. ஒரு கடைந்தெடுத்த பிற்போக்குவாதி போலப் பேசுகிறார்.

சென்ற முறை கோவிலில் பெண்களின் நுழைவுக்கு ஆதரவு தெரிவித்து, போராட்டக்காரர்களின் மீது நடவடிக்கை எடுத்ததுதான் பாராளுமன்றத் தேர்தலில் தனது தோல்விக்குக் காரணம் என மார்க்சிஸ்ட் கட்சி கருதுகிறது. அதன் காரணமாகவே இப்பொழுது அது பெண்களின் நுழைவுக்கு அனுமதியை மறுக்கிறது.

       கடந்த முறை அது மேற்கொண்ட அணுகுமுறை, இந்த முறை அது மேற்கொள்ளும் அணுகுமுறை இரண்டுமே தவறான அணுகுமுறைகள் என்பதை அது புரிந்து கொள்ளவில்லை.

சென்ற முறை உச்சநீதிமன்றத் தீர்ப்பின்படி,  பெண்களின் கோவில் நுழைவை ஒரு நிர்வாக நடவடிக்கையாகவும், அதை எதிர்த்துப்  பிற்போக்கு சக்திகள் போராட்டம் நடத்தியபோது  அதை ஒரு சட்ட ஒழுங்குப் பிரச்சினையாகவும் மட்டுமே கேரள அரசாங்கம் பார்த்தது. ஆனால் உண்மையில் பிரச்சினையின் தன்மை வேறுபட்டது.

       இந்தச் சமூகத்தில் ஆணாதிக்கக் கருத்துகளும் பிற்போக்குக் கருத்துக்களுமே ஆதிக்கம் செலுத்தி வருகின்றன.. பெரும்பான்மையான ஆண்களிடம் இத்தகைய கருத்துகளே மேலோங்கியுள்ளன.

       பெரும்பான்மையான  பெண்களும் அக்கருத்துகளைச் சரியானவை என்றே ஏற்றுக் கொண்டுள்ளனர். அதாவது ஏற்றுக் கொள்ள வைக்கப்பட்டுள்ளனர். அதனால் அவர்களும் கூட சபரிமலைக்குப்  பெண்கள் சென்றால் புனிதம் கெட்டுவிடும் என்றே கருதுகின்றனர். கோவிலில் பெண்கள் நுழைவதற்கு எதிர்ப்புத் தெரிவிக்கின்றனர். பெரும்பான்மையான பெண்களிடமும் குடி கொண்டுள்ள இத்தகைய ஆணாதிக்க, பிற்போக்கான கருத்துகளை முதலில் முறியடிக்க வேண்டும். அதன் மூலம்  பெண்களைக் கோவில் நுழைவுப் போராட்டத்திற்கு அணி திரட்ட வேண்டும். பல்லாயிரக்கணக்கான பெண்களை அணி திரட்டி கோவில் நுழைவை ஒரு மக்கள் திரளின் நிகழ்வாக மாற்ற வேண்டும். ஆனால் மார்க்சிஸ்ட் கட்சி அதைச் செய்யத் தவறியது.

       கடந்த முறை பல்லாயிரக்கணக்கான பெண்கள் கலந்து கொண்ட மனிதச் சங்கிலிப் போராட்டத்தை பெண்களின் கோவில் நுழைவுக்கு ஆதரவாக மார்க்சிஸ்ட் கட்சி கட்டமைத்தது. ஆனால் அதை ஒரு அடையாள போராட்டமாகத்தான் நடத்தியதே ஒழிய, பெண்களின் சிந்தனையில் ஒரு அடிப்படை மாற்றத்தைக் கொண்டு வரக் கூடிய ஓர் இயக்கமாக அதை மேலேடுத்துச் செல்லவில்லை.. தனது தலைமையின் கீழ் உள்ள ஜனநாயக மாதர் சங்கம் போன்ற அமைப்புகள் மூலம் அதற்கான இயக்கத்தைக் கட்சி கட்டமைத்திருக்க வேண்டும். ஆனால் கட்சி அதைச் செய்யத் தவறியது.

       கடந்த முறை பெண்களின் கோவில் நுழைவுக்கு ஆதரவு தெரிவித்ததால்தான் தேர்தலில் தோல்வி அடைந்தோம் எனக் கருதி இந்த முறை பெண்களைக்  கோவிலில் அனுமதிக்க மாட்டோம் எனக் கட்சி அறிவிக்கிறது.  அதன் மூலம் சமூகத்தில் நிலவி வரும் ஆணாதிக்கக் கருத்துகளுக்கும் பிற்போக்குக் கருத்துகளுக்கும் அது அடி பணிந்துள்ளது. சமூக மாற்றத்திற்காக நிற்கும் ஒரு கட்சி மக்களிடம் மண்டிக் கிடக்கும் பிற்போக்கான கருத்துகளை எதிர்த்துப் போராடி அவற்றை முறியடிக்க வேண்டும். அதன் மூலமே மக்களை சமூக மாற்றத்தை நோக்கி வழி நடத்திச் செல்ல முடியும். அதற்குப் பதிலாக சமூகத்தில் ஆதிக்கத்தில் இருக்கும் பிற்போக்குக் கருத்துகளுக்கு அடிபணிந்து, அதற்கேற்ற வகையில் தனது செயல்பாடுகளை அமைத்துக் கொள்ளும் ஒரு கட்சி சமூக மாற்றத்திற்குத் தலைமை தாங்கக் கூடிய கட்சியாக இருக்க முடியாது. நிலவி வருகின்ற பிற்போக்கான நிலைமையைக் கட்டிக் காப்பாற்றுவதற்குச்  சேவை செய்யும் கட்சியாகத்தான் இருக்க முடியும்.   அத்தகைய கட்சியாகத்தான் மார்க்சிஸ்ட் கட்சி இருக்கிறது.  

- மு. வசந்தகுமார்