ஜார்ஜ் ப்ளாய்டும் - இடையப்பட்டி முருகேசனும்

   நேற்று (23.6.2021) சேலம் மாவட்டம் இடையப்பட்டி முருகேசனும் அவருடையை இரண்டு நண்பர்களும் மது அருந்திவிட்டு இரு சக்கர வாகனத்தில் திரும்பி வரும் பொழுது அவர்களைப் பிடித்த  உதவி ஆய்வாளர் பெரியசாமி என்பவர் முருகேசன் மீது கண் முடித்தனமான தாக்குதலை நடத்தியுள்ளார். அதனால் முருகேசன் உயிர் இழந்துள்ளார்.

         முருகேன்  மீது  வெறித்தனமாக  லத்தியைக்  கொண்டு தாக்கிய பொழுது 'சார், சார், அடிக்காதீங்க விடுங்க, சார்' என அவர் கெஞ்சுவதைக் காணொளியில் காணமுடிகிறது. ஆனால், அவர் அடி தாங்க முடியாமல் வலியால் கதறுவதையும்   பொருட்படுத்தாமல், ஈவு இரக்கம் சிறிதும் இல்லாமல் அவர் உயிர் போகும் அளவுக்கு அந்த அதிகார வெறி கொண்ட உதவி ஆய்வாளர்  தாக்கியுள்ளார். 

           இந்தக் காணொளி அமெரிக்க போலிஸ் அதிகாரி கருப்பினத்தைச் சேர்ந்த ஜார்ஜ் பிளாய்ட்டின் மீது நடத்திய  கொடூரமான தாக்குதலை நமக்கு நினைவுபடுத்துகிறது. அப்பொழுது  ஜார்ஜ் பிளாய்ட், 'என்னால் மூச்சு விட முடியவில்லை, ப்ளீஸ், ப்ளீஸ்' எனத் தொடர்ந்து  சொல்லிக் கொண்டே இருக்கிறார்.  ஆனால்,  எட்டு நிமிடங்களுக்கும் மேலாக, அவருடைய கழுத்தின் மீது காலை வைத்து  இறுக்கி அவரை மூச்சுத் திணற வைத்துச் சாகடித்தான் இன வெறி கொண்ட   ஒரு வெள்ளைப் போலீஸ்காரன்.

           இங்கு மது குடிப்பது சட்ட விரோதமனதல்ல.  அரசே சாராயக் கடைகளை நடத்தி மக்களைக் குடிக்கப் பழக்கி வருகிறது. அதன் மூலம் கணிசமான வருமானத்தையும் அடைந்து வருகிறது.  இந்த நிலையில் முருகேசனை அடிக்க வேண்டிய தேவை ஏன் ஏற்பட்டது? அவர் மது அருந்தி இருந்ததுதான் காரணமா? உறுதியாக அது காரணமாக இருக்க முடியாது. அப்படியே அவர் வேறு ஏதாவது சட்ட விதிகளை மீறி இருந்தால் கூட அவர் மீது சட்டரீதியான நடவடிக்கை எடுக்க வேண்டியதுதானே அந்தப் போலிஸ் அதிகாரியின் கடமையாக இருக்க முடியும். அதை விட்டு அவரை உயிர் போகும் அளவுக்கு அடிப்பதற்கு போலிசுக்கு சட்டப்படி என்ன அதிகாரம் உள்ளது?

    மக்களை போலிஸ் அடிப்பதற்கு சட்டப்படி எந்த அதிகாரமுமில்லை; மக்களை போலிஸ் அடிப்பது என்பது சட்டவிரோதமானது  என்ற கருத்தை இங்குள்ள ஆட்சியாளர்கள் வலியுறுத்துவதில்லை. அவ்வாறு சட்டத்தை மீறுபவர்கள் மீது கடுமையான நடவடிக்கைகள் எதுவும் இங்கு எடுக்கப்படுவதும் இல்லை. போலிசின் சித்திரவதைகளால் மனித உயிர்கள் பலி கொள்ளப்படும் சமயங்களில் மட்டும் மக்களின் கடுமையான எதிர்ப்புகளைச் சமாளிக்கவும், மக்களை அமைதிப்படுத்தவும் பணி இடை நீக்கம் போன்ற சில கண் துடைப்பு நடவடிக்கைகள்  மேற்கொள்ளப்படுகின்றன.  சிலர் கைது செய்யப்பட்டு அவர்கள் மீது வழக்குகள் தொடுக்கப்பட்டாலும் சில ஆண்டுகளில் அவர்கள் மீது  குற்றம் நிரூபிக்கப்படவில்லை என்று விடுவிக்கப்பட்டு, மீண்டும் பதவிக்கு வந்து விடுகின்றனர். அதுமட்டுமல்லாமல் பதவி உயர்வும் பெறுகின்றனர்.

    இங்குள்ள குற்றவியல் நடைமுறைச் சட்டங்களுக்கு அடிப்படையாக இருப்பது பிரிட்டிஷ் காலனிய ஆட்சிக் காலத்தில் உருவாக்கப்பட்ட சட்டங்கள்தான். அடிமை நாட்டில் உள்ள அடிமைகளை ஆள்வதற்காக எஜமானர்களால் உருவாக்கப்பட்ட சட்டங்கள் அவை. மக்கள் மீது அதிகார வர்க்கம் எவ்வளவுதான் அடக்குமுறைகளைச் செலுத்தினாலும் அதிகாரவர்க்கத்தைத் தண்டிக்க முடியாத வகையிலும், அவர்களைப் பாதுகாக்கும் வகையிலும் அந்தச் சட்டங்கள் உருவாக்கப்பட்டன. அந்தச் சட்டங்களை அப்படியே எடுத்துக் கொண்டு ஆங்காங்கு  சில பிரிவுகளை மாற்றியமைத்து, மக்களை அடக்கி ஒடுக்க இங்குள்ள ஆளும் முதலாளிய வர்க்கம் பயன்படுத்தி வருகிறது. அதனால்தான் இந்தச் சட்டங்களைப் பயன்படுத்தி  மக்கள் மீது அடக்குமுறைகளைச் செலுத்தும் அதிகாரவர்க்கத்தின் மீது நடவடிக்கை எடுப்பது சாத்தியமாவதில்லை.

        அடித்தட்டு உழைக்கும் மக்கள் மீது அரசின் ஒடுக்குமுறை கருவிகளான போலீசு, இராணுவம், நீதிமன்றம் ஆகியவை எப்பொழுதும் அடக்குமுறைகளையும், வன்முறைகளையும்  ஏவி வருகின்றன. இதன் மூலம் மக்களிடையே எப்பொழுதும் ஒருவித அச்ச உணர்வை உளவியல் ரீதியாக உருவாக்கி வருகிறது ஆளும் வர்க்கம்.  அரசுக்கு எதிராக மக்கள் கருத்துகள் தெரிவிப்பதையோ, போராடுவதையோ முடக்குவதற்கான செயல்பாடுகள்தான் இவை.

        2020 ஜூன் 9 ஆம்தேதி அன்று ஜார்ஜ் பிளாய்ட்டின் மீதான தாக்குதலுக்குப் பிறகு அமெரிக்க மக்களின் தொடர் போராட்டங்கள் அந்த அரசைப் பணிய வைத்தன. ஜார்ஜ் பிளாய்ட்டை படுகொலை செய்த போலிஸ் அதிகாரி ‘டெரெக்சாவின்’ மீது கொலை வழக்கு பதிவு  செய்து, கைது செய்யப்பட்டு விசாரணை நடைபெற்று, நீதிமன்றத்தில் கடந்த ஏப்ரல் 20 ஆம் தேதி அவர் குற்றவாளியென தீர்ப்பளிக்கப்பட்டது. அதனைத் தொடர்ந்து ஜார்ஜ் பிளாய்ட்டின் பெயரிலேயே போலிஸ்  சீர்த்திருத்த மசோதாவையும் அமெரிக்க அரசு தாக்கல் செய்துள்ளது. கொலை நடந்து 10 மாதங்களிலேயே விரைவான விசாரணை  நடத்தப்பட்டு  தண்டனை  வ ழங்கபட்டுள்ளது.

         ஆனால், ஏறக்குறைய இதே காலகட்டத்தில் 2020 ஜூன் 19 ஆம் தேதியன்று சாத்தான்குளத்தில் ஜெயராஜ் மற்றும் அவருடைய மகன் பென்னிக்ஸை படுகொலை செய்த வழக்கில் போலிஸ் அதிகாரிகள் கைது மட்டுமே செய்யப்பட்டுள்ளனர்.  விசாரணை இன்னும் தொடக்க கட்டத்திலேயே உள்ளது. இந்த விசாரணை முடிய இன்னும் சில ஆண்டுகள் ஆகும். குற்றவாளிகள் தண்டிக்கப்படுவார்கள் என்பதற்கு எந்த உத்தரவாதமுமில்லை. இதே நிலைமைதான் சமீபத்தில் படுகொலை செய்யப்பட்ட இடையப்பட்டி முருகேசன் வழக்கிற்கும் நிகழும்.  மக்களின் கோப உணர்ச்சிகளை தணிக்க போலிஸ் அதிகாரி பெரியசாமி கைது செய்யப்பட்டாலும், அவர் மீதான வழக்கும்  கிடப்பில்  போடப்படும்.

        தன்னிடம் உள்ள அதிகார பலத்தைக் கொண்டு மக்கள் மீது தன்னுடைய வன்முறையை  நிகழ்த்தும் அரசின் போக்கு தமிழ் நாட்டில் மட்டுமில்லாமல் இந்திய ஒன்றியம் எங்கும் நிறைந்து காணப்படுகின்றன. அவை நாளுக்கு நாள் அதிகரித்து வருகின்றன.  முதலாளித்துவ ஜனநாயகத்தில் இருக்கும் குறைந்தபட்ச உரிமைகள் கூட இங்கு மறுக்கப்படுகின்றன. இந்த உரிமைகளைப்  பெறுவதற்கே பெரும் போராட்டங்களை நடத்த வேண்டியுள்ளது.

        ஜார்ஜ் பிளாய்டின் நினைவாக அமெரிக்காவில் போலிஸ்  சீர்த்திருத்த மசோதா தாக்கல் செய்யப்பட்டுள்ளது.  உரிமைகளைப் பற்றிய மக்களிடையே இருந்த விழிப்புணர்வும் ஒற்றுமையும் போராட்ட குணமுமே அத்தகைய சீர்திருத்த மசோதாவுக்குக் காரணமாக இருந்தன. மக்கள் தங்களுடைய உரிமைகளைப் பற்றிய விழிப்புணர்வு பெற்று ஒற்றுமையுடன் போராடுவதன் மூலமே இங்கும் தமது உரிமைகளை வென்றெடுக்க முடியும்! உறுதிப்படுத்த முடியும்!

சோசலிசத் தொழிலாளர் இயக்கம்

தமிழ் நாடு