தொழிலாளர்கள் நலனில் அக்கறையற்ற தமிழ்நாடு அரசும் தொழிற்சங்கத் தலைமைகளும் !

 இந்திய அரசினால் தொழிலாளர் சட்டங்கள் திருத்தப்பட்டு 2019 மற்றும் 2020 ஆம் ஆண்டுகளில் நான்கு புதிய சட்டத்தொகுப்புகளாக மாற்றப்பட்டன. இந்த சட்டத் திருத்தங்களுக்கு எதிராகத்  தொழிலாளர்களும் தொழிற்சங்கங்களும் தங்கள் எதிர்ப்புகளைப் பலவகைகளில் தெரிவித்து வந்தாலும் இந்திய அரசோ புதிய தொழிலாளர் விரோதச்  சட்டங்களை நிறைவேற்றியதோடு அதனை நடைமுறைப்படுத்தும் வேலையிலும் தொடர்ந்து ஈடுபட்டு வருகின்றது.

அந்த வகையில் மாநில அரசுகள் இந்தச் சட்டங்களையொட்டி மாநில அளவில் அதற்கான விதிமுறைகளை வகுக்க மத்திய அரசு உத்தரவிட்டிருந்தது. மத்திய அரசின் உத்தரவையொட்டி அனைத்து மாநில அரசுகளும் அதற்கான வேலைகளைத் தொடங்கியிருக்கின்றன.

தமிழ்நாட்டிலும், மாநில அரசானது மூன்று சட்டத் தொகுப்புகளுக்கான   (ஊதிய சட்டத் தொகுப்பு, பணியிடப் பாதுகாப்பு ஆரோக்கியம் மற்றும் பணிநிலைமைகள் குறித்த சட்டத்தொகுப்பு, தொழில் உறவுகள் சட்டத்தொகுப்பு) விதிமுறைகளை ஏப்ரல் மாதம் 11 ஆம் தேதி வெளியிட்டிருக்கின்றது. இதன் மீதான கருத்துகள், ஆலோசனைகள், ஆட்சேபனைகளை  45 நாட்களுக்குள் தெரிவிக்கவேண்டும் எனக் குறிப்பிட்டிருக்கின்றது.

ஆனால், இந்த விதிமுறைகள் அனைத்துத்  தொழிலாளர்களும் புரிந்துக்கொள்ளும் வகையில் தாய் மொழியான தமிழில் இல்லை. பெரும்பாலான தொழிலாளர்கள் புரிந்துகொள்ள முடியாத வகையில் ஆங்கிலத்தில் வடிவமைக்கப்பட்டிருக்கிறது. சட்டத் துறையில் உள்ளவர்களே புரிந்து கொள்ள முடியாத அளவுக்கு அதிகாரவர்க்கத்தினால் ஆங்கிலத்தில் தயாரிக்கப்படும் அரசு ஆணைகள் எப்பொழுதும் சிக்கலான வாக்கியங்களையும், சொற்றொடர்களையும் கொண்டிருக்கும்.

இந்த நிலையில் குறைந்த அளவே படிப்பறிவு கொண்ட தொழிலாளர்களால்  அந்த அரசாணையைப் படித்துப் புரிந்து கொண்டு ஆலோசனைகளும் கருத்துகளும், ஆட்சேபனைகளும் எப்படித் தெரிவிக்க முடியும்? தொழிலாளர்கள் நலனில் அக்கறை கொண்ட ஒரு அரசாக இருந்தால் அரசாணையைத் தாய் மொழியில் கொண்டு வந்திருக்க வேண்டாமா? அதுவும் ‘எங்கும் தமிழ்’,  ‘எதிலும் தமிழ்’  எனக் கூறிக் கொள்ளும் கட்சியின் தலைமையின் கீழ் உள்ள  அரசு, ‘தமிழினத் தலைவரின் வாரிசுகளின் அரசு’ எனக் கூறிக் கொள்ளும் ஒரு அரசு ஏன் பாமரர்கள் புரிந்து கொள்ள முடியாத ஒரு அந்நிய மொழியில் அரசாணையைக் கொண்டு வர வேண்டும்? அப்படியானால் அரசின் உண்மையான நோக்கம் என்னவாக இருக்கும்? தொழிலாளர்கள் இந்தச் சட்டத்தைப் படித்துப் புரிந்து கொண்டு, அதற்கு எதிரான கருத்துகளை, ஆட்சேபனைகளை முன் வைத்துவிடக் கூடாது கூடாது என்பதைத் தவிர அதன் நோக்கம் வேறு எதுவாக இருக்க முடியும்? தொழிலாளர்கள் மத்தியிலிருந்து எந்தவிதமான ஆட்சேபனைகளும் எதிர்ப்பும் இல்லை எனக் கூறி சட்டத்தை எளிதாக நிறைவேற்றி விடலாம் இல்லையா?

அரசு மட்டும் அல்லாமல்,  இங்குள்ள தொழிற்சங்கத் தலைமைகளும் தொழிலாளர்களின் நலனில் அக்கறை கொண்டதாக இல்லை. எந்தத் தொழிற்சங்கத் தலைமையும் அந்தச் சட்ட முன் வரைவைத் தமிழில் கொண்டு வர வேண்டும் எனக் கோரவில்லை. தொழிலாளர்கள் புரிந்துக் கொள்ளும் வகையில் தமிழில் சட்ட முன் வரைவைக் கொண்டு வந்து அதைத் தொழிலாளர்கள் மத்தியில் வைத்து விவாதித்து, அந்தச் சட்டத்த்தினால் தொழிலாளர்களுக்கு விளையப்போகும் பாதகமான விசயங்களைப் பற்றிய விழிப்புணர்வைத் தொழிலாளர்கள் மத்தியில் உருவாக்க வேண்டும் என்ற அக்கறை சிறிதும் அந்தத் தொழிற்சங்கத் தலைமைகளுக்கு இல்லை.

தனது அரசியல் இலாபத்திற்காக வேளாண் சட்டங்களைத் தமிழ்நாட்டில் நடைமுறைப்படுத்த முடியாது என்று சட்டப்பேரவையில் தீர்மானம் இயற்றிய தமிழக அரசு தொழிலாளர் சட்டத்திருத்தங்களைத் தமிழ்நாட்டில் கொண்டு வர முடியாது என்ற தீர்மானம் இயற்றாமல் இந்திய அரசின் தொழிலாளர் விரோதப் போக்கிற்கு ஒத்து ஊதுகின்றது. அதன் மூலம் தான் முதலாளிய வர்க்கத்திற்கான அரசுதான் என்பதை அப்பட்டமாக ஒத்துக் கொள்கிறது.

இந்திய அரசு தொழிலாளர் சட்டங்களை இயற்றியபொழுது அதனைத் தொழிலாளர்களிடம் கொண்டு சென்று அவர்களை அணிதிரட்டிப் பரந்துபட்ட போராட்டங்களை கட்டியமைக்காமல் பெயரளவிற்கு அறிக்கைகளை மட்டும் விட்டுத் தங்கள் பாட்டாளி வர்க்கக் கடமைகளை ஆற்றி விட்டதாகத்  தொழிற்சங்கத் தலைமைகள் திருப்தி அடைந்து விட்டன.  இவர்களின் சந்தர்ப்பவாதப் போக்கைச் சரியாகப் பயன்படுத்திக் கொண்ட மோடி அரசு கடுமையான எதிர்ப்புகள் எதுவுமில்லாமல் தொழிலாளர் விரோதச் சட்டங்களை தடலாடியாக நிறைவேற்றியது.

அதேபோன்று தமிழக அரசு தற்பொழுது கொண்டு வந்துள்ள விதிமுறைகள் குறித்துத் தொழிலாளர்களிடம் தொழிற்சங்கத் தலைமைகள் கொண்டு சென்று  பரந்துபட்ட விவாதங்களை நடத்தவில்லை. தொழிலாளர் நலன்களுக்கு எதிரான சட்டவிதிகளை எதிர்த்துத் தொழிலாளர்களை அணி திரட்டவில்லை.  

இப்படி ஒரு சட்ட விதிமுறைகள் அரசால் வெளியிடப்படட்டதையே தமிழ்நாட்டில் உள்ள தொழிற்சங்கத் தலைமைகள் மூடிமறைத்துள்ளன. இடதுசாரிக் கட்சிகளின் தலைமையில் உள்ள தொழிற்சங்கத் தலைமைகளும் இதற்கு விதிவிலக்கல்ல.

தொழிலாளர்களின் நலனில் அக்கறையற்ற இத்தகைய தொழிற்சங்கத் தலைமைகளின் பிடியிலிருக்கும் தொழிலாளர்கள் அவர்களின் சந்தர்ப்பவாதப் போக்கிலிருந்து தங்களை விடுவித்துக் கொண்டு பாட்டாளி வர்க்கமாய் ஓர் அணிதிரள வேண்டும்.

தமிழக அரசு வெளியிட்டிருக்கும் தொழிலாளர் சட்டவிதிமுறைகளை அனைத்துத் தொழிலாளர்களும், புரிந்துகொள்ளும் வகையில் தமிழில் வெளியிட வேண்டும் என்றும், அதுவரை இந்தச் சட்ட விதிமுறைகளை இறுதி செய்வதை தமிழக அரசு நிறுத்தி வைக்க வேண்டும் என்றும் தொழிலாளர்கள் ஒன்றிணைந்து வலியுறுத்த வேண்டும்.

-                                                                                                                                                       சோசலிசத் தொழிலாளர் இயக்கம்.